82 настай эмэгтэй, нуруугаар бага зэрэг өвдөнө гэсэн зовууртай ба хэд хоногийн өмнө гэртээ угаалгын өрөөндөө халтирч унасан өгүүлэмжтэй. Жилийн өмнө гэрийнхээ гадаа бүдэрч унаад баруун гарын бугуйн хугарал авч байсан.

Артерийн даралт ихсэх өвчин, улаан хоолойн сөөргөө, нойргүйдэл болон сэтгэл гутрал зэрэг ( 7 жилийн өмнө нөхөр нь нас барсан) хавсарсан эмгэгтэй. Тогтмол амлодипин, сертралин, лоразепам болон мултивитамин уудаг. Хорт зуршилгүй, түүний ээж нь ясны хугарал авч байгаагүй ба аав нь артерийн даралт ихсэх өвчинтэй байсан.

Үзлэгт: өндөр 155 см, жин 54,5 кг, артерийн даралт 125/80 мм муб,

Нурууны үений хөдөлгөөн бага зэрэг хязгаарлагдсан, нуруу бага зэрэг кифоз өөрчлөлттэй.

Гарын түшлэггүйгээр сандалнаас босож чаддаггүй, алхахаасаа өмнө өөрийгөө тогтворжуулах шаардлагатай. Бусад эрхтэн тогтолцоонд өөрчлөлтгүй. Лабораторын шинжилгээгээр өөрчлөлт илрээгүй байна.

Цаашид авах арга хэмжээнээс оновчтойг нь сонгоно уу?

А. Рентген денситометрийн шинжилгээгээр ясны сийрэгжилт илэрсэн тохиолдолд алендроны хүчил буюу бифосфонатыг ууж хэрэглэх, кальци витамин Д нэмэлтээр уух

В. Нурууны рентген зураг авч хугарал байгаа эсэхийг илрүүлэх, золендроны хүчил буюу бифосфонатыг судсаар тарих, кальци витамин Д хавсарч хэрэглэх

С. Ууж буй эмийн эмчилгээг үргэлжлүүлэн нэмэлтээр кальци, витамин Д уулгах

D. Frax -ийн 10 жил дотор ясны хугарал авах эрсдэлийг үнэлэн зөвхөн кальци ууж хэрэглэх

Зөв хариулт: B

50-аас дээш насанд нурууны хугарал авсан тохиолдолд ясны нягтрал тодорхойлох денситометрийн шинжилгээ хийгдээгүй ч ясны сийрэгжилтийн шинж тэмдэг байна гэж үздэг.

Нэг нугаламд хугарал авсан бол цаашид давтан хугарал авах эрсдэл 5 дахин нэмэгддэг. Харамсалтай нь нугаламын хугаралын үед шинж тэмдэг бүдэг эсвэл огт шинж тэмдэггүй байж болдог учир зарим тохиолдолд олон жилийн турш оношлогдохгуй байх нь түгээмэл байдаг.

Рентген зураг нь нурууны нугаламын хугарал илрүүлэх алтан стандарт шинжилгээ юм.

Денситомери DXA- бүсэлхийн нуруу болон түнхний ясны нягтаршил тодорхойлох шинжилгээ нь ясны сийрэгжил оношийг батлах, хугарлын эрсдэлийг тооцох болон эмчилгээний үр дүнг хянахад ач холбогдолтой.

FRAX нь 10 жилийн дотор ясны хугарал авах эрсдэлийг үнэлдэг шалгуур бөгөөд өмнө ясны сийрэгжилтийн эсрэг эмчилгээ хийлгэж байгаагүй 40-90 насны бүх хүмүүсийг үнэлэх боломжтой. http://www. sheffield.ac.uk/FRAX.

Кальцийг 19-50 насны эмэгтэйчүүд болон 19-70 насны эрэгтэйчүүдэд өдөрт 1000 мг, 51 ба түүнээс дээш насны эмэгтэйчүүд болон 71 ба түүнээс дээш насны эрэгтэйчүүд өдөрт 1200 мг уухыг зөвлөдөг.

Д аминдэмийн дутагдалтай тохиолдолд ийлдэс дэх 25(OH)D-ийн түвшинг ойролцоогоор 30 нг/мл (75 нмоль/л) түвшинд барих ба эмчилгээнд 50,000 нэгж витамин D2 эсвэл витамин D3 долоо хоногт нэг удаа 5-8 долоо хоногийн турш хэрэглэнэ.

Цаашид зорилтот түвшинг хадгалахын тулд өдөрт 1000-2000 нэгж тунгаар уух шаардлагатай.

Бифосфонат, алендронат натрийг цэвэршилтийн дараах ясны сийрэгжилт болон ясны сийрэгжилтээс урьдчилан сэргийлэх зорилгоор хэрэглэнэ. Өмнө нь ясны хугарал авч байсан бол 3 жилийн дотор дахин хугарах эрсдэлийг 50 хувиар бууруулдаг байна.

Алендроны хүчлийг эмчилгээний зорилгоор 70 мг тунгаар 7 хоног 1 удаа өглөө өлөн үед усаар даруулж уух ба 30 мин турш босоо байрлалтай байхыг зөвлөдөг.

Гаж нөлөө болон аюулгүй байдлын хувьд хоол боловсруулах талаас залгихад хүндрэлтэй байх, улаан хоолойн үрэвсэл, хэвлийн өвдөлт зэрэг илэрдэг тул хоол боловсруулах замын эмгэгтэй хүнд болгоомжтой хэрэглэхийг зөвлөнө.

Золендроны хүчлийг цэвэршилтийн дараах ясны сийрэгжилтээс урьдчилан сэргийлэх болон эмчилгээний зорилгоор хэрэглэнэ. Давтан нурууны нугаламын хугарал авах эрсдэлийг 55 хувиар бууруулдаг байна. Золендроны хүчлийг эмчилгээний зорилгоор 100 мл-т 5мг аар судсаар 15-30 минутын турш жилд 1 удаа тарьж хэрэглэдэг. Эмчилгээний явцад томуу төст шинж тэмдэг илрэх бөгөөд үүнээс урьдчилан сэргийлэх зорилгоор 2 стакан ус болон ацетаменофен уухыг зөвлөдөг.

Бифосфонатыг хэрэглэхийн өмнө кальци болон Д витамины дутагдлыг нөхөх шаардлагатай ба бөөрний түүдгэнцэрийн хурд 35 мл/мин ба түүнээс бага бол эсрэг заалттай.