58 настай эмэгтэй 2 хөлийн шагайнаас доош хавагнаад гутлаа өмсөж чадахгүй байна гэсэн зовуурьтай үзүүлэв. 2-3 сарын өмнөөс анх шагайгаар нь хавагнаад байсан тул танилаасаа шээс хөөх эм авч уугаад хаван нь буурсан гэнэ. Харин энэ удаад эм уугаагүй. Сүүлийн хэдэн сарын турш тогтмол дасгал хөдөлгөөн хийж, эрүүл зөв хооллож байгаа ч жин 10-11 кг-аар нэмэгдэж. Өвчтөнд ЧШ, хэв шинж II ононшлогдож сульфонилмочевины бүлгийн эм уудаг. Тогтол хяналтанд байдаггүй, гэрээр цусан дахь сахарын хэмжээгээ хянадаггүй. Шээх үед өвдөх, ойр ойрхон шээх, шээс гэнэт хүрэх шинж тэмдэггүй ч шээс нь хөөстэй гарч байгаа. Халуурах, үе мөч өвдөх, арьсан дээр тууралт гарах болон хоол боловсруулах замын талаас ямар нэгэн шинж тэмдэггүй. Бодит үзлэгээр нүднй зовхи бага зэргийн хавантай, нүдний уг дурандах шинжилгээгээр олон тооны экссудат өөрчлөлт, цэгчилсэн цус хуралттай. Гар, хөл, шилбэн дээр дарахад хавантай. Уушги 2 талд цулцангийн амьсгалтай, зүрхний хэм жигд, шуугиангүй, хэвлий тэмтрэлтээр эмзэглэлгүй. Шилбэний дунд хэсгээс доош дарахад мэдрэхүй буурсан. Шээсний ерөнхий шинжилгээгээр глюкоз 2+, уураг 3+, цагаан эс, улаан эс нитрит илрээгүй.

Хамгийн магадлалтай онош?

Хариулт

- ЧШ-ийн нефропатийн шалтгаантай нефроз хам шинж.

Уг өвчний явцыг хэрхэн удаашруулах вэ?

-Ангиотензин хувиргагч ферментийг саатуулагч эсвэл ангиотензины рецепторыг хориглогч бүлгийн эм уулгах.

Нефроз хам шинжийн эмчилгээ нь үндсэн өвчнийг (хэрэв оношлогдсон бол) эмчлэх, хаван буулгах, бөөрний гэмтлийг удаашруулах зорилготой байдаг. Хавангийн эмчилгээний хувьд бүх өвчтөнүүдэд давсны хэрэглээг хязгаарлахыг зөвлөдөг ба ихэнх өвчтөнд шээс хөөх эм шаардлагатай байдаг. Тиазид болон гогцооны шээс хөөх эм хоёулаа уурагтай холбогддог тул хаван буулгахын тулд ихэвчлэн өндөр тунгаар хэрэглэх шаардлагатай болдог. Гэсэн хэдий ч гипопротеинемитэй өвчтөнд хоол хүнсэндээ уураг хязгаарлахыг зөвлөдөг. Уургийн өндөр хэрэглээ нь зөвхөн шээсээр ялгарах уургийн хэмжээг ихэсгэж улмаар бөөрний үйл ажиллагаанд сөргөөр нөлөөлдөг гэж үздэгтэй холбоотой юм.

Глюкожсон гемоглобиныг 6.5-7.0-с бага байлгах зорилготой гликемийн хатуу хяналт нь микроальбуминуритай өвчтөнд бөөрний өвчний явцыг удаашруулж эсвэл урьдчилан сэргийлдэг гэж үздэг. Бөөрний үйл ажиллагаа муудах тусам инсулины хэрэгцээ ихэвчлэн буурдаг.

Ангиотензин хувиргагч ферментийг саатуулагч эсвэл ангиотензины рецепторыг хориглогч бүлгийн эмүүдийн аль нэгээр ангиотензиныг дарангуйлах нь цусны даралтыг хянахаас үл хамааран бөөрний өвчний явцыг сааруулдаг. Хэдийгээр энэ хоёр бүлгийн эмийг хооронд нь шууд харьцуулсан судалгаа байхгүй ч ихэнх экспертүүд ЧШ-тэй өвчтөнд ижил нөлөөтэй гэж үздэг. Зүрх судасны өвчин нь ЧШ-тэй өвчтөнүүдийн нас баралтын гол шалтгаан болдог тул тамхинаас татгалзах, цусан дахь холестериныг бууруулах зэрэг бусад эрсдэлт хүчин зүйлүүдийг засах хэрэгтэй. ЧШ-тэй өвчтөнүүдийг зүрх судасны өвчний хамгийн өндөр эрсдэлтэй бүлэгт тооцдог бөгөөд бага нягтралтай липопротейныг (LDL) 100 мг/дл-ээс бага байлгах зорилго баримтална. Харин ЧШ-тэй өвчтөнд титэм судасны хатуурлын эмгэг байгаа бол LDL-ийн түвшинг 70 мг/дл-ээс бага байлгах шаардлагатай.

ЧШ-тэй бүх өвчтөнд цусны даралтын хэмжээг 130/80 мм м.у.б-аас бага, эсвэл хоногийн протеинурийн хэмжээ 1 г-аас их өвчтөнд 125/75 мм м.у.б-аас бага байлгах нь өвчний явцыг удаашруулахад зайлшгүй шаардлагатай гэж үздэг.