21 настай эрэгтэй сүүлийн 3 хоног өвдөлтгүй, цустай шээнэ гэсэн зовуурьтай эмнэлэгт хандав. Чихрийн шижин, I хэв шинж, хяналт сайн, бусдаар өөр архаг өвчингүй. Өвчтөн саяхан хоолой өвдөөд эдгэсэн гэнэ. Шээсэнд цус болон уураг илэрсэн бол таныхаар хамгийн магадлалтай онош юу вэ?

a. Шенлейн генохын өвчин

b. Түрүү булчирхайн хоргүй томрол

c. IgA нефропати

d. Диабетийн нефропати

e. Шээсний замын халдвар

Зөв хариулт: C

Гематури нь нүдэнд илэрхий цустай шээх (макроскопын гематури) эсвэл шээсний шинжилгээгээр (микроскопын гематури) оношлогдож болно. Макроскопын гематури буюу илэрхий шээсэнд цус ажиглагдах үед хэзээ гарч байгаагаас нь хамаарч цус хаанаас гарч байгааг таамаглаж болох ч үүнд бүрэн найдаж болохгүй. Давсагнаас цус алдаж байгаа бол ихэвчлэн шээж эхлэхээс дуусах туршид шээс цустай гардаг, давсагнаас доош болон түрүү булчирхайнаас байгаа бол шээсний төгсгөлд, харин шээсний сүвнээс цус гарч байвал шээсний эхэнд цустай гарна. Тестээр илэрсэн гематуриг батлах зорилгоор шээсний дэлгэрэнгүй шинжилгээ хийж эритроцит байгаа үгүйг баталгаажуулна.

Цилиндр үүснэ гэдэг нь эритроцитүүд бөөрний сувганцраар дамжихдаа нэг нэгтэйгээ наалдаж цилиндр хэлбэрийн бүтэц үүсгэж шээстэй хамт ялгарч байгааг хэлнэ. Шээсээр ийнхүү эритроцитын цилиндр ялгарах нь түүдгэнцрийн эмгэгийг заана. IgA нефропати буюу Бергерийн өвчин нь гломерулонефритийн хамгийн элбэг тохиолддог шалтгаан бөгөөд аль ч насанд тохиолдож болно. Фарингитын давшингуй хэлбэр нь түүдгэнцрийн гэмтлийг нэмэгдүүлснээр далд хэлбэрийн гематури үүсгэдэг.

-Шенлейн Генохын өвчин нь илүү системийн гэмтэл тэр дундаа том үенүүдийн үрэвсэл, хэвлийн өвдөлт болон өвөрмөц тууралт зэргээр илэрдгээрээ IgA нефропатигаас ялгарна. /А/

-Өвдөлт болон шээх үеийн зовуурь үгүй учир шээсний замын халдвар үгүйсгэгдэж байна. /Е/

-Диабетийн нефропати нь гематури гэхээс илүүтэйгээр протеинуригээр илэрдэг. /D/

-Харин түрүү булчирхайн хоргүй томрол нь илүү өндөр настай хүмүүст элбэг тохиолддог ба шээсний гарц муудах болон шээх үеийн бусад зовуурь илэрдэг. /В/