46 настай эрэгтэй ХБДэЗ-с цус алдсаны улмаас эмнэлэгт хэвтжээ. Тэрээр өмнө нь ходоод-дээд гэдэсний шархлаа өвчин оношлогдож түүндээ протоны шахуурга хориглогч эм уудаг. 4 жилийн өмнө ХБДэЗ-аас цус алдаж байсан гэнэ.

Өвчтөнд шингэн сэлбэсний дараа цус эргэлт тогтвортой болж цусан дахь HCT /гематокрит/ үзүүлэлт сүүлийн 8 цагт өөрчлөгдөөгүй байна. ХБДэЗ-ыг дурандаж шалгав.

Дуранд илэрсэн доорх өөрчлөлтүүдээс аль нь ойрын 3 хоногт дахин цус алдах эрсдэл хамгийн бага вэ?

А. Шархан дээр гематин тав тогтсон

В. Шархны ёроол цэвэр харагдах

С. Артер-венийн судасны гаж хөгжилтэй ходоодны шарх

D. Цус гарч буй судас харагдах

E. Цус гараагүй судас харагдах

Зөв хариулт: B

Эмнэлэгт ХБДэЗ-аас цус алдаж буй өвчтөнүүдийн нас баралт 5-10% байдаг бөгөөд голдуу цус багадалтаас илүү тухайн өвчтөний суурь өвчин нь нас барах шалтгаан болдог.

Ходоод-дээд гэдэсний шархлаа өвчин нь эмнэлэгт хэвтэх шаардлагатай ХБДэЗ-ын цус алдалтын хамгийн нийтлэг шалтгаан бөгөөд тохиолдлуудын 50%-г эзэлж байна.

Бусад шалтгаанд варикозын цус алдалт, Маллори-Вэйссийн хам шинж, ХБДэЗ-ын шалбархайт өвчнүүд, хорт хавдар, тодорхойгүй шалтгаанууд ордог.

Дурангаар шархыг харагдах байдлаар нь үнэлэх нь өвчтөний тавиланг тооцоход чухал мэдээлэл болдог.

Судаснаас идэвхтэй цус гарч байгаа болон цус гараагүй судас харагдах өвчтөнүүдийн 1/3-т дахин цус алдах эрсдэл өндөр тул мэс заслын эмчилгээ шаардлагатай байж болно.

Ихэнхдээ дахин цус алдалт 3 хоногт тохиолдох тул шархны ёроол цэвэр харагдахаас бусад дурангийн шинжилгээнд илэрсэн өөрчлөлтүүдийг дээрх хоногт хянах нь зүйтэй.

Дуранд шархны ёроолд цус гарсан оромгүй цэвэр харагдвал түр тайвширч болох бөгөөд өвчтөний биеийн байдал тогтвортой, эмнэлэгт хэвтэх өөр заалт байхгүй бол аюулгүй гэж үзэн эмнэлгээс гаргаж болно.