Таны шөнийн жижүүр дээр 78 настай эрэгтэй гэнэт амьсгаадах боллоо гэсэн дуудлага ирлээ. Өвчтөний түүхийг нь уншихад 2 сарын өмнө уушгины жижиг эсийн хавдар оношлогдсон бөгөөд туяа болон хими эмчилгээнд орсон байв. 3 хоногийн өмнө баруун гуяны ясны эмгэг хугарал сэжиглэж хэвтүүлсэн байна. Хавдрын үсэрхийлэл оношлогдоогүй. 30 минутын өмнөөс гэнэт хурдан хурдан амьсгалах болсон.

Амин үзүүлэлтүүд: ЗЦТ 1 мин-д 115 удаа, АД 92/69 мм.м.у.б, АТ 1 мин-д 32 удаа, хүчилтөрөгчийн сатурац хамрын гуурсаар 4 л авахад 94% байв.

Үзлэгээр: түүний царайны илрэл тайван бус, уушги чагналтаар 2 талд ижил цулцангийн амьсгалтай, зүрхний авиа жигд, шуугиангүй байсан.

Тухайн өвчтөнд авах тохиромжит дараагийн алхам юу вэ?

a. Эмнэлгийн нөхцөлд үүссэн уушгины үрэвслийг эмчлэхээр антибиотик шууд эхлэх

b. Гепариныг эмчилгээний тунгаар яаралтай судсан дотуур тарих

c. Цахилгаан кардиоверси синхрон тохиргоогоор угсарч бэлдэх

d. Цээжний вентиляц/перфуз (V/Q) шинжилгээ хийлгэхээр дуудах

e. Бензодиазепин хийх

Зөв хариулт: b

Эмнэлэгт хэвтэж буй өвчтөнд цочмог амьсгаадалт үүсэх олон шалтгаан байгаа ч тухайн өвчтөний хувьд уушгины тромбэмболи байх магадлал өндөр байна. Шинж тэмдэг цочмог эхэлснээс гадна тромбэмболизм үүсэх эрсдэлүүд (хавдар, ясны хугарал, хөдөлгөөнгүй байдал) нь уушгины тромбэмболи байх магадлалтайг харуулж байна. Вирховын гурвалын тромб үүсгэх нөхцөлүүдэд гиперкоагуляц, цусны эргэлт удаашрах, эндотелийн гэмтлээр дүрслэгддэг. Венийн тромбоэмболизмын өвөрмөц эрсдэл хүчин зүйлүүдэд ойрын үед орсон хагалгаа, гэмтэл, , өмнөх тромбэмболын тохиолдол, хөдөлгөөнгүй байдал, хавдар, гиперкоагуляцын байдал зэрэг ордог. Гиперкоагуляци байдлын шалтгаанд протромбин генийн мутац, антифосфолипид эсрэг бие, фактор V Лейден мутац, гипергомоцистеинеми, C, S уургийн дутагдал, антитромбин III ордог. Туйлын эсрэг заалт байхгүй тохиолдолд уушгины тромбэмболын эмчилгээний эхний сонголт бол антикоагулянт юм. Уушгины тромэмболын шалтгаант нас баралтын дийлэнх нь шинж тэмдэг эхэлсэн эхний 1 цагт тохиолддог тул (цээжний КТ эсвэл V/Q) шинжилгээгээр онош баталтал эмчилгээг хойшлуулах нь тохиромжгүй юм. Вентиляц/перфуз-ээр үнэлэх (Хариулт d) нь уушгины хавдар, туяа эмчилгээний өгүүлэмжтэй, цээжний рентген дээр өөрчлөлттэй тохиолдолд төвөгтэй юм. Тус тохиолдолд уушгины судасны КТ хийх нь илүү зөв сонголт. Хэдий уушгины хатгаа (Хариулт а) байж болох ч шинж тэмдэг гэнэт эхэлсэн, ногоон цэр гараагүй, уушги чагналтаар цэвэр байгаа зэргээс үзэхэд уушгины тромбэмбол оношоос магадлал багатай байна. Өвчтөний биеийн байдал тогтворжсоны дараа уушгины хатгааг оношилж болно. Хариулт с бол буруу. Учир нь уушгины тромбэмболын улмаас синусын тахикарди үүссэн. Шалтгааныг эмчлэхэд синусын тахикарди хэвийн болно. Хэдий тайвшруулах эмчилгээнд (Хариулт е) шинж тэмдэг багасаж болох хэдий ч даралт бага үед бензодиазепины хэрэглээг хязгаарладаг. Хэрвээ уушгины тромбэмболын шалтгаанаас илүү сэтгэл түгшүүрийн атак илэрсэн гэж үзвэл даралт унах биш ихэвчлэн өсдөг.