Архаг хууч өвчингүй 23 настай эмэгтэй 6 сарын өмнө артерийн даралт ихсэх өвчин оношлогдсон. Түүнд эхлээд гидрохлоротиазид, дараа нь нэмээд лизиноприл, сүүлд нь калцийн суваг хориглогч нэмсэн боловч АД сайн буухгүй байв. Тэрээр эмүүдийг таслалгүй, хугацаанд нь уусан гэнэ. Үзлэгээр 2 гарт АД 165/105 мм.МУБ, доод мөчид том манжатаар үзэхэд АД 168/105 мм.МУБ, ЗЦТ 60 удаа/мин байв. Чагнахад зүрхний 4-р авиа сонсогдох боловч шуугиангүй. Хэвлийн дунд хэсгээр судасны лугшилтын зөөлөн чимээ сонсогдоно. Мөчдийн судасны лугшилт хоёр талдаа ижил тэмтрэгдэнэ. Арьсны нөсөөжилт, үсэрхэг шинж (гирсутизм) байхгүй, бэлэг эрхтэн хэвийн, таргалалтын гаж өөрчлөлт байхгүй.

Шинжилгээнд натри 140, кали 4.0, HCO3 22, шээг 15, мөн креатинин 1,5 байв.

Дараахаас аль нь АД ихсээд буухгүй байх шалтгаан бэ?

A. Анхдагч гиперальдостеронизм (Конны хам шинж)

B. Кушингийн хам шинж

C. Бөөрний дээд булчирхайн төрөлхийн гиперплази

D. Бөөрний артерийн фибромускуляр дисплази

E. Гол судасны коарктаци

Зөв хариулт: D

Энэ залуу өвчтөнд анхдагч артерийн гипертензи байх боломж бага. Фибромускуляр дисплазийн шалтгаантай бөөрний артерийн нарийслаас хэвлийн судасны лугшилтын чимээ үүсэж болох ба үүнээс хоёрдогчоор артерийн даралт ихсэж болно. Фибромускуляр дисплазигаар голдуу (85-90%) залуу эмэгтэйчүүд өвдөнө Энэ өвчний шалтгаан тодорхойгүй ч бөөрний артерийн нарийслаар артерийн даралт ихсэж илэрдэг. Бөөрний ангиографигаар бүрэн оношлох ч дуплекс хэт авиан шинжилгээ, СТ ангиографи, MRI ангиографигаар оношлож боломжтой. Фибромускуляр дисплазитай төстэй шалтгаануудад атеросклероз, васкулит зэрэг багтана.

Тухайн өвчтөнд Кушингийн хам шинж (таргалалтын гаж өөрчлөлт, экхимоз, гирсутизм), бөөрний дээд булчирхайн төрөлхийн гиперплази гиперплази (бэлгийн дааврын өөрчлөлт), гол судасны коарктаци (артерийн даралт хөлд бага байх) гэхээр өөрчлөлтүүд байхгүй. Мөн анхдагч гиперальдостеронизмоос үүсэх гипокалиеми болон солилцооны алкалозын шинжүүд байхгүй.