23 настай эрэгтэй зүрх дэлсэх, пресинкопийн дайралтын шинж бүхий толгой эргэх зовуурьтай яаралтай тусламжийн тасагт хандав. Тэрээр 4 сарын өмнө аймшгийн кино үзэж байхдаа ухаан алдаж унасан гэнэ. Ургамлын тоосны харшилаас өөр өвчний түүхгүй ч, удамшлын өгүүлэмжээр шалтгаан тодорхойгүй гэнэтийн нас баралтын түүхтэй (аав нь 29 настайдаа нас барсан).

Бодит үзлэгт: ЗЦТ- 60 удаа/мин, жигд, АД 110/70 мм м.у.б., гүрээний венийн даралт ихсээгүй, зүрхний авиа хэвийн, уушгинд цулцангийн амьсгалтай, хэвлий зөөлөн, эмзэглэлгүй. Зурагт түүний ЭКГ хавсаргав.

Асуулт

1. ЭКГ дээрх өөрчлөлт?

2. Магадлалтай онош?

3. Шинж тэмдгийг юу өдөөсөн байж болох вэ?

4. Цаашид авах арга хэмжээ?

1. ЭКГ:

a) ЗЦТ: 50 удаа/мин

b) Хэмнэл: синусын

c) QT: 680 мс (17 жижиг квадрат х 40 мс). RR интервал нь 1200 мс (30 жижиг квадрат х 40 мс)

d) QTc: 621 мс (QTc = QT/√RR интервал (сек) 680/√1.2) (Зураг 2).

QT интервал

QRS комплексийн эхлэлээс Т шүдний төгсгөл хүртэлх хугацааг QT интервал гэнэ. QT интервалд зүрхний цохилтын тоо нөлөөлдөг (зүрхний цохилт хурдан байх тусам QT интервал богиносдог) тул зүрхний цохилтын тоогоор уг интервалын утгыг засдаг ба үүнийг QTc /corrected QT/ гэж нэрлэдэг. QTc-г абсолют QT интервалыг R-R интервалын квадрат язгуурт хуваах замаар гаргадаг, жишээ нь зүрхний цохилтын тоо 1 минутанд 60 гэж тооцвол R-R интервалыг 1 секунд гэж үзнэ, тиймээс QT нь нэгийн квадрат язгуурт хуваагдана, өөрөөр хэлбэл зүрхний цохилтын тоо минутанд 60 байх үед QT=QTc байна. Нийт хүн амын 2,5%-д QT интервал ямар нэгэн сөрөг нөлөөгүйгээр уртассан байдаг ба мөн тодорхой шалтгаангүйгээр ЭКГ хооронд өөрчлөгдөж байдаг тул QT интервалын хэвийн утгыг тодорхойлоход хүндрэлтэй байдаг. Ерөнхийдөө эрэгтэйчүүдэд QTc<430 мс, эмэгтэйчүүдэд QTc<450 мс байхыг хэвийн гэж үздэг.

2. QT уртсах хам шинж (төрөлхийн).

3. Ургамлын тоосны харшил болон антигистамины хэрэглээ QT интервалыг уртасгах боломжтой. QT интервалыг уртасгадаг олон тооны эмүүд тухайлбал зарим нянгийн эсрэг, мөөгөнцөрийн эсрэг болон сэтгэцэд нөлөөлдөг эмүүд байдаг. QT интервал уртассан тохиолдолд эдгээр эмийг хэрэглэхээс зайлсхийх хэрэгтэй.

4. Өвчтөнд нарийн мэргэжлийн үзлэг шинжилгээ хийх шаардлагатай. Энэ нь оношийг батлах, гэр бүлийн бусад гишүүдийг шалгах, өвчтөний эрсдлийг үнэлэх боломжийг олгоно. Тус өвчтөнд өндөр эрсдэлийн хэд хэдэн шинж байгаа тул түүнд зүрхний дефибриллятор суулгах талаар авч үзэх хэрэгтэй. Эмэн эмчилгээний эхний сонголтонд ихэвчлэн бета блокаторыг зөвлөдөг. Энэ бүлгийн эмнүүд хэм алдагдах магадлалыг бууруулхаас гадна хэм алдагдалыг өдөөж болох гэнэтийн үйл явдлын (жишээ нь аймшгийн кино үзэж байх үед тохиолдож болох) улмаас симпатик идэвхижихийг бууруулахад ач холбогдолтой.